Cakakak

Onyon Biantara Agustusan (2)

foto

Ilustrasi./pixabay.com

"MERDIKAAA...!" ceuk si Onyon ngagorowok deui, ditémpas kunu araya, "Merdikaaaa....!" cenah.

Dibagaékeun kalayan meriah, liang irung si Onyon katara beukah. Mana komo basa pareng nénjo ka beulah wétan aya nu hérang meunang dibaju beureum mah, biantara si Onyon beuki sumanget, sumanget pajoang '45.

"Langkung ti payun simkuring ngahaturkeun wilujeng sumping ka sadayana, utamina ka Bapa Lurah, Bapa RW, Bapa RT, sareng bapa-bapa sadayana...," nyarita kituna téh panon si Onyon teu leupas tinu baju beureum.

"Nya kitu deui simkuring ngahaturkeun réwu nuhun laksa keti kabingahan kana kasayogian sadayana, utamina Ibu Lurah, Ibu RW, Ibu RT, sareng ibu-ibu sadayana, boh ka Ibu Tuti, Ibu Anih, Ibu Icih, Ibu Onah, pokona kum ka sadayana teu diwiji-wiji...." gelenyu si Onyon imut, ger nu lalajo surak duméh ngadéngé biantara si Onyon kawas panyiar radio keur ngirimkeun lagu dina acara manasuka.

"Dina raraga miéling tepung taun kamerdikaan nagara urang, sawadina urang ngarasa gumbira, réhna nagara urang geus merdika, bébas tina bangbaluh para penjajah deungeun."

"Ieu sakabéh hasil tina perjoangan para pahlawan tur sakumna rahayat bangsa Indonésia saréatna, hakékatna kemerdikaan téh paparin ti Gusti Alloh. Ngalartos sadayana? Cobi nu teu ngartos mah saé ngacungkeun panangan wé ulah ngacungkeun sampéan, awon!" ceuk si Onyon teu euleum-euleum.

Tapi nu lalajo nya kitu deui pa Lurah saparakanca, tinggelenyu, malah aya nu nyakakak sagala. (hanca) **

Bagikan melalui
Berita Lainnya
Onyon Ngala Suluh
Si Onyon di Puskesmas