Cakakak

Onyon Biantara Agustusan (4)

foto

Ilustrasi./pixabay.com

"PARA pamuda ulah loyo," ceuk si Onyon.

"Guuung..!" goong gedé aya nu nakol tarik naker.

"Panuju!" ceuk nu lalajo jero haténa.

"Nya kitu deui para sepuh gé ulah loyo. Sabab lamun para pamuda loyo, para sepuhna loyo, laun-laun bangsa urang jadi bangsa laloyo...." ceuk si Onyon deui saregep naker.

"Kelentrung!" calung aya nu nakol.

"Arék moal ieu téh? Mun moal rék dicalana deui," ti juru kulon kadéngé aya nu ngajorowok.

"Biantara atawa ceramah ieu téh euy?" nu séjén teu éléh sindir.

"Heueuh geus kesel yeuh, didagoan ku pamajikan rék ngajuru!" ceuk nu lianna

"Buru atuh, heug isukan rék bedugan, peuting teuing mah bisi tunduh!"

Si Onyon teu maliré kanu tingcorowok nyarékan, manéhna kalah pok deui neruskeun cacarita.

"Tingkatkeun sumangét gawé, tingkatkeun sumanget diajar, tingkatkeun sumanget hirup, tingkatkeun sumanget bajoang nangtungkeun bebeneran jeung kaadilan," cenah.

Sungut ngabamblam, leungeun mah paciweuh pepeta bin ngopépang ka luhur ka handap, ka gigir ka hareup, nya kitu deui sukuna sakapeun jéngké, sakapeung ngangkang ka luhur, malah ka dituna mah gagaro sagala rupa bari aduh-aduhan.

"Tingkatkeun sumanget, aduh! Sabagé bangsa merdika, aduh, urang kudu...aduh.....!"

Keur kitu ti tukang bagaéan sonsistem nyetél rékaman jaipongan, ti dituna mah ngecék wungkul bisi dina waktuna gagal.

Ngadéngé tepak jaipong si Onyon biantarana beuki motah....nu ahirna réngkénék manéhna ngéngklak jaipongan bari cacalawakan pindato dicampur aduh-aduhan
bari leungeunna ngopépang kana kélék, kana punduk, kana palangkakan teu béda jeung nu keur kasurupan.

Horéng si manahoréng, basa si Onyon biantara aya budak heureuy ngalungkeun bungkusan keretas nu di jerona sireum ateul wungkul. Mokaha si Onyon rék motah gagaro gé! (réngsé/ieu seratan tos dimuat dina HU GALA, edisi Minggu 28 Agustus 1988 dina rubrik Ceuleukeuteuk) **

Bagikan melalui
Berita Lainnya
Onyon Ngala Suluh
Si Onyon di Puskesmas